Como tódolos anos, no mes de novembro fixemos actividades relacionadas cos Dereitos dos Nenos e Nenas e Adolescentes.
Neste curso 2013-2014 centrámonos en tres contidos clave: necesidades, desexos e dereitos, así como no dereito á participación. Traballamos a diferencia entre as necesidades e os desexos, para descubrir que a cada necesidade correspóndelle un dereito humano.
Os obxectivos foron:
- Descubrir que hai cousas que necesitamos para medrar e poder ser felices e outras que simplemente desexamos.
- Poñer en valor o que os nenos e as nenas poden facer polas súas comunidades.
Outra das nosas actividades foi destacar contos sobre os dereitos. Tres deles estiveron expostos nos corredores do centro.
E cada un fixo a súa tarxeta da Galaxsilla, coas que fixemos unha exposición, para destacar a importancia da solidariedade.
De novo foi solicitada a nosa colaboración nunha campaña de recollida de roupa usada e calzado. En esta ocasión tratouse de Global Humanitaria, ONG que traballa dende 1999 na cooperación internacional e na defensa dos dereitos dos nenos, favorecendo procesos de desenvolvemento que garantan a igualdade de oportunidades das persoas e dos pobos.
Co obxectivo de reforzar
os seus proxectos, Intervida e máis Educación Sin Fronteras uníronse e
crearon Educo, unha ONG global de
cooperación para o desenvolvemento que actúa alí onde máis os necesitan. A súa
prioridade continúa a ser a infancia e a defensa dos seus dereitos, de maneira
especial o dereito a recibir unha educación de calidade. Xuntaron as súas
experiencias e os seus esforzos co obxectivo de continuar impulsando os
proxectos actuais e emprender retos novos.
Esta foi a razón de que no presente curso a nosa amiga Paula se fixera esperar un pouco máis de tempo. Pero agora temos xa todo disposto para organizar os talleres deste ano. O calendario queda como sigue:
OBRADOIRO PARA O PROFESORADO: Martes, 3 de decembro. 16:30 - 18:00 h.
OBRADOIRO PARA AS FAMILIAS: Martes, 10 de decembro. 16:30- 18:00 h.
OBRADOIROS PARA O ALUMNADO DE EDUCACIÓN PRIMARIA:
Martes, 14 de xaneiro
Martes, 25 de marzo
Martes, 27 de maio
Neste curso 2013-2014 traballaremos sobre o dereito á participación, porque os nenos e nenas somos quen de participar na sociedade e temos dereito a facelo.
